134. De Omnibus Sanctis.

1. Redemptor noster Domine,
Qui passus es pro homine,
Nostra peccata hodie
Dele pro tuo nomine.

2. Salve, regina virginum,
Quae genuisti Dominum,
Hunc pro salute hominum
Ora, mater omnium.

3. Salve cum tuis angelis,
Michael venerabilis,
Juvamen miserabilis
Plebs petit et instabilis.

4. Salve cum sanctis patribus
Omnibus atque vatibus,
Baptista, nos suavibus
Coelorum ciba dapibus.

5. Salvete terrae principes,
Venturi quoque judices,
Regni Dei participes
Nos faciatis pauperes.

6. Salve, felix societas
Martyrum, vestra dignitas
Nos protegat et pietas,
Ne maculet iniquitas.

7. Salve cum confessoribus,
Martine, et doctoribus,
Nos ab inferni foribus
Custodi et doloribus.

8. Salve, turba virginum,
Quae flores sicut lilium,
Precare Dei filium,
Ut tollat molem criminum.

9. Tota coelestis curia,
Salve, nos ab injuria
Eripe et a furia
Hostis, qui nutrit jurgia.
10. Et post hanc vitam labilem,
Brevem ac lamentabilem
Nos semper fac amabilem
Videre Dei faciem.