140. De Beata Maria V.

(Figurae veteris Testamenti.)

1. Gaude, virgo laudabilis,
Gaude, mater mirabilis,

Nati per exordia,
Dei mater et filia,
Ipsi nos reconcilia

Impetrando gaudia.

2. Gaude, mater virginalis,
Gaude, virgo triumphalis,

Per Dei potentiam,
Inter matres nulla talis,
Nato consubstantialis

Per carnis materiam.

3. Post esum pomi vetiti,
A sponsa sponso traditi

Serpentis astutia,
Post collatam miseriam
Traheris in memoriam

Praemunis malitia.

4. Praedixit Deus veteri
Serpenti caput conteri

Muliebri capite;
Tu caput es femineum,
Concalcans vipereum

Paupertate divite.

5. Sponsis serpens mortem parat,
Frater fratris caput arat

Vulnere letifero;
Fratricida fit Iudaeus,
Cum mortem passus est Deus
Ligno salutifero.

6. De lumbis Adae prodiens,
Ab arcae claustris exiens

Successorum germine,
Collata benedictio
Tua multiplicatio

In sanctorum agmine.

7. Dumque patris nuda videt
Cham pudenda, male ridet

Sibi dans opprobrium,
Deridentes facta Dei
Crucifixi sic ludaei

Sibi dant exitium.

8. In filio iucundare,
Promisso filio Thare

Procedente tempore,
Tres videns unum honorat,
Cibos ponit et adorat
In prostrato corpore.

9. Theos Abrahae sic dicam:
Benedicens benedicam

In data progenie,
Nam filium Sarae dabo,
Ismael multiplicabo

Numero familiae.

10. Sacerdos magnus, rex Salem
Vini, panis immortalem

Placat sacrificio ;
Sic verus sacerdos fratri
Misertus obtulit patri

Se crucis supplicio.

11. Tu es odor agri pleni.
De quo memoria seni

Caligatis oculis,
Postremum benedicenti
Placet Deo et parenti

Fitque notum saeculis.

12. Videns Deum Iacob luctat,
Benedictus sic eructat:

Vidi Deum facie;
Datur nomen, salus datur
Et nobiscum minoratur

In humana specie.

13. Redemptorem Christum credit
Iob temptatus nec recedit

A fidei solio,
Resurrecturum se clamat
Et visurum se, quem amat,

Ultimo iudicio.

14. A patre missus accedit
Ad fratres Ioseph, recedit

Venditus in pretium.
Noster a patre descendens
Verus Ioseph fit ascendens

Post crucis supplicium.

15. Primus Ioseph venumdatus
Honoratur et temptatus

Profecit scientia,
Noster pie humanatus,
Temptatus et cruci datus

Resurgit potentia.

16. Fraternitas non cognoscit
Fratrem, nec minus ignoscit

Humilis in prosperis;
Ab angelo minoratus
A proximis ignoratus

Miseretur miseris.

17. Dixit Iacob: Princeps erit
Iudas nec stirpi deerit

Sceptralis potentia,
A gentibus exspectatus
Donec veniet rex natus,
Dei sapientia.

18. Rubum videt inflammatum
Moyses nec minoratum
Pastor factus ovium;
Stat rubus in incendio,
Sic stat in puerperio
Virgo gignens filium.

19. A servitute lutea

Surgens abit gens Hebrea

Sequens Dei famulum;
Ab inferni potentia
Redemit sapientia

Deus Dei populum.

20. Dat Hebraeis salutare
Nubis, ignis luminare

Auferendo devium;
Sic geminat in renatis
Luminare caritatis

Pellens omne noxium.

21. Manna mandunt in deserto,
Carnes pluunt in aperto,

Tollitur inopia ;
Manna replet vas aureum,
Sic uterum virgineum

Deus Dei copia.

22. Pontificis virga floret,
Fructificat, cum ignoret

Naturae suffragium:
Virgo, natura mirante
Illibata post et ante

Dei paris filium.

23. Per Balaam appellaris
Stella Iacob, lux solaris.

Luminis initium-
Ex Israel surgens domo
Praeparans Deus et homo

Ducibus exitium.

24. Turbis inquit legislator:
Post me surget profanator,

Tamquam me suscipite;
Prophetam qui recipiet
Venturum, nunquam periet

A sanctorum tramite.

25. Signa quaerit, dantur signa
Gedeoni duo digna,

Pluvia madentia;
Ibi Deus a simili
Divina confert humili

Rorans beneficia.

26. Samson ducit alienam,
Revocat Christus egenam

Gentium ecclesiam;
Samson urbis claustra tulit,
Inferni Christus abstulit

Captivam familiam.

27. Anna sterilis a pari,
Cum te vidit fecundari,

Grates agit Domino;
Praedicit Christum regnare
Et deinceps iudicare

Ignorato termino.

28. Regem dedit Israeli
Loquens Deus Samueli

Facie ad faciem ;
Reprobat, cum non obedit,
Deus hunc, alterum dedit ;
Cognitus per speciem.

29. Regnat David et post eum
Regnare promittit Deum

Deus suo semine;
Semen David assevero
Verbum in homine vero,

De te natum virgine.

30. Ego flos campi, lilium
Sum, Deus, et convallium

Spes, salus humilium.
Tibi, mater, virginitas,
Tibi, virgo, fecunditas,

Duplex beneficium.

31. Salomonis consecrata
Mulier quaerit a data

Frui sapientia ;
Sterilis et viduata
Ad Christum est revocata,

Cedit idolatria.

32. Veniet rex, inquit illa
Austri regina Sibylla,

Sceptra praebens regibus,
Novus nova signa dabit
Et in fine iudicabit
Cum suis principibus.

33. Iuxta vaticinium
Isaiae filium

Profers maris nescia ;
Rorat caelum, nubes pluunt
Salvatorem et effluunt

Eius beneficia.

34. Novum fecit Deus mirum,
Cum tu sine viro virum

Concepisti, femina;
Placantem genus hominum
Deo patri tu Dominum
Peperisti, domina.

35. Clausam vidit portam sera
Ezechiel et revera

Notatur sacrarium ;
Clausa semper exstitisti
Parens, Deo tribuisti

Humile refugium.

36. Adventu sancti sanctorum
Cessabit circumcisorum

Regalis inunctio,
Fiat licet temporalis
Eius virtus, triumphalis

Sic sanctorum natio.

37. Signum datur sannianti
Regi lapis, ignoranti
Lapidis officium;
Lapis Christus struens reges,
Idolatris novas leges
Dans vitae commercium.

38. Tres illaesi sunt ab igne,
Quia Deus suos digne

Salvat salvans omnia;
Patri, nato, paraclito
Laudes referunt subito

Sopita calumnia.

39. Mira videns mira refert
Rex indignus, cui defert

Superna clementia;
Quantus, inquit, Dei natus
His apparens miseratus
Adest cum laetitia.

40. Sic eructat Virgilius:

De caelo natus filius

Et nova progenies

Procedet tam subtilius,

Quam ipse mirabilius

Novat novas facies.

41. De te, virgo singularis,
Prodit lapis angularis

Aptus aedificio,
In structura, cum surrexit,
Duas uno circumtexit
Gentes beneficio.