135. De sancta Anna.
Ad Vesperas.

1. Exsultet coeli curia
Et mundana ecclesia
Magna gerendo gaudia
Propter Annae solemnia.

2. Haec est illa sterilitas,
Quae est nobis fecunditas,
Nam peperit haec Mariam,
Matrem Christi et filiam.

3. Haec sumuntur avidius,
Et delectantur potius,
Quae naturae contraria
Dantur divina gratia.

4. Sic ergo diu sterilis
Anna fuit et humilis
Et passa est opprobria,
Quae abstulit haec filia.

5. Hujus fama dilatatur,
Quia in hac generatur
Orbis totius conditor
Et ipsius dispositor.

6. Nam Gabriel archangelus,
Ille summus paranymphus,
Ad Mariam properavit,
Cui talia nuntiavit:

7. Gaude, puella regia
De sobole Davidica,
Ex te nascetur filius,
Coeli terraeque Dominus.

8. Laus et honor sit aeterno
Patri ejusque filio
Sanctoque simul flamini
In omni vita saeculi.