137. De sanctis Angelis.

1. Angelici spiritus

omnes o beati,

Novem in ordinibus

mire collocati,

2. Ruentibus plurimis

tute praeservati,

Nobis in auxilium

estote parati.

3. Et quia clementia

vos sola divina

Ab hac apostatica

servavit ruina,

4. Merito pro gratia

tanta creatori

Et vestro in gloria

fideli tutori

5. Estis in perpetuum

sine fine grati

Et in innocentia

ita confirmati,

6. Quod peccare minime

vultis nec potestis,

Securi de gloria

vestra semper estis.

7. De beatitudine

vitae vobis data

Et de certitudine

vobis hinc collata

8. Nequaquam valebitis

in aevum moveri,

Nec ullis poteritis

hostibus terreri.

9. Sicut infidelitas

in vobis et nulla,

Sic neque crudelitas

praevalebit ulla.

10. Omnes a principio

vos immaculati,

Fideles et incliti,

Deo copulati;

11. Sibi juxta placitum

laeti servientes

Et ejus in jubilo

faciem videntes,

12. Et cum ad nos pauperes

missi declinatis,

Ut nos a spiritibus

malis defendatis,

13. Nequaquam privamini

Dei visione

Nec ejus fraudamini

tunc fruitione.

14. Mente semper alacres

estis atque mundi,

Pulchri et amabiles,

juvenes jucundi.

15. Quam consolatorii

sitis et quam boni,

Opem et praesidium

conferre quam proni,

16. In tentationibus

nostris experimur,

Dum vestro juvamine

in pugna munimur.

17. Carne nostra fragili

cito vinceremur,

Si vestro munimine

non circumdaremur.

18. Heu, quam nostris cordibus

sumus obscurati,

Quod non vobis amplius

de his simus grati.

19. Sed vos patientiam

in hoc habeatis,

Opem nobis miseris

nunquam subtrahatis,

20. Nostras ante Dominum

preces praesentetis

Et Mariam virginem

pro nobis oretis,

21. Quae est mundi domina,

regina coelornm,

Hominum et omnium

rectrix angelorum.

22. Ut sic per angelicos

vos mediatores

Levemur ad coelicos

inhabitatores,

23. Ubi de terrigenis

multae sublevatae

Gaudent cum coelicolis

animae beatae.

24. Ibi gratitudinis

carmina canemus

Atque Deo gratias

de vobis agemus.

25. Bona nobis nuntia,

Gabriel, futura,

Sauciata, Raphael,

corda nostra cura.

26. Saeva, sancte Michael,

remove tormenta

Atque nostras animas

Deo repraesenta.

27. Benedictus Dominus,

qui vos sic creavit,

In beatitudine

taliter firmavit,

28. Ut vobis non opus sit

quidquam formidare,

Possitis et pauperes

nos hic adjuvare.

29. Laus, honor et gloria

Deo sit deorum

In omnia saccula,

regi saeculorum.