Sermo X .

Item, sermo fratris Bonaventurae Fratribus de Lugduno.

Illuminare, Ierusalem, quia venit lumen tuum, Isaiae sexagesimo .

Sanctus Propheta Isaias, supercaelesti radio perlustratus, hortatur in ista sacra solemnitate electos Dei ad tria, scilicet ad refulgentias supercaelestis sapientiae vigilanter participandas, cum dicit: Illuminare; ad influentias spiritualis gratias supermentaliter degustandas, cum dicit: Ierusalem; ad efficacias singularis Verbi incarnati praesentiae praecordialiter recognoscendas, cum subdit: quia venit lumen tuum.

Circa haec omnia scire debemus, quod in Christo, Verbo incarnato, fuerunt septem lumina mundum illuminantia et mundo radiantia, post quae et ad quae et secundum quae fuit et est omnibus proficisci tutissimum.

Fuit enim in eo lumen radiantis munditiae corporis et animae vel animi; Psalmus : Confessio et pulcritudo in conspectu eius etc.; Esther octavo: Iudaeis nova lux oriri visa est.

Radiantis laetitiae spiritus et faciei; Iob vigesimo nono : Lux vultus mei non cadebat in terram.

Radiantis sapientiae caeli; Ecclesiastae octavo: Sapie ntia luminis lucet in vultu eius, et potentissimus faciem illius commutabit.

Radiantis gratiae Spiritus sancti; Proverbiorum decimo septimo: In facie prudentis lucet sapientia; Iob trigesimo septimo : Lumen illius super terminos terrae.

Radiantis vitae Evangelii; Ioannis octavo : Ego sum l ux mundi; qui sequitur me non ambulat in tenebris, sed habebit lumen vitae.

Radiantis famae praeconii; Ioannis quinto: Ille erat lucerna ardens et lucens.

Radiantis gloriae paradisi; Ioannis primo: Erat lux vera etc; Ioannis duodecimo: Ego lux i n mundum veni; ut omnis, qui credit in me, in tenebris non maneat etc