137. De Beata Maria v.

la. Verba buccinate,
Mariam laudate ;
Hoc Deus praecipit,
Ut psalmus praecinit
In laudem Mariae.

1b. In neomenia
Fiat laetitia;

Omnes consurgite,
Lunam aspicite,
O Sion filiae.

2 a. In insigni die
Cantemus Mariae.
Cuius conceptio
Est sine vitio
Ex privilegio.

2b. Salomonis verbum
Confudit superbum,
Tota mater pulchra
Et sine macula,
Similis lilio.

3 a. Inter spinas crescit,
Lilium mitescit,

Nos spinis pungimur;
Ad te confugimus,
Audi nos, Maria.

3 b. Est sine scoria
Virgo egregia,
Fecit potentiam
Conservans Mariam
Divina sophia.

4 a. Filius honorat

Matrem, quem praeservat
A culpae macula,
Qui fecit saecula,
Iesus benedictus.

4b. Iudith gloriatur,

Quod non maculatur,
Hostis decollatur ;
Maria signatur,

Cuius dulcis fructus.

5 a. Assuerus decrevit
Iudaeos perdere,
Hesther tamen dixit:
Noli metuere,
Nam te excipio.

5 b. Hesther elevata,

[Quae] culpam non habet,
Est virgo beata,

Haec mortem occidit
Virtutis gladio.

6 a. Virgo purissima,
A morte pessima
Conserva famulos
Et pios oculos

Ad servos converte;

6 b. O virgo virginum,
Duc nos ad gaudium
Et post exsilium
Praedulcem filium
Devotis ostende.