138. De Beata Maria V.

1 a. Grloriosae virgini
Choris in angelicis
Iubilemus hodie ;

1b. Elevatis oculis
Corde devotissimi
Psallamus caeligenae.

2 a. Omni carens macula,
Rosularum rosula,
Mundi sprevit gaudia.

2b. O quam clara, caelica,
Dulcis, mitis, benigna
Fulget inter caelica.

3 a. Radix nobilissima
De stirpe Davidica,
Angelorum gloria,
Veritatis glosula,
Sauciatos in peccatis
sana, pia domina.

3 b. Imperatrix angelica,
Ad te clamantes iuva,
O clemens, dulcissima,
Ingens Dei filia,
Fac, ut hostis pessum detur
per tua suffragia.

4 a. Vivax idcirco gratia
Nobis sit propitia,
Post dura transitoria
Nobis des caelestia.

4b. Synagoga Iudaica

Pereat et glosula,
Omnis quoque fallacia
Quam dicta prophetica.

5 a. Flevit nimis benedicta,
Cum gens caeca, maledicta
Crucifixit filium.

5 b. Ensis eam pertransivit,
Christus cum se inclinavit
Et emisit spiritum.

6 a. Caesum virgis, coronatum,
Crucifixum, vulneratum
Magnum regem gloriae,

6 b. In cruore purpuratum
Lanceaque perforatum
Imploremus hodie,

7. Tot infinita gaudia
Ut nobis praestet gloria
In caelesti patria.