139. Oratio ad omnes Apostolos.

1. Alme Petre, haerens petrae
Qui petram aedificas,
Me de poena mortis taetrae
Trahe ac resuscitas.
2. Petrus, Cephas, Simon dictus,
Firmus, capax, obediens,
Per me semper benedictus
Sit et me sit custodiens.
3. Petrus, firmans ecclesiam
Suis magnis miraculis,
Det mihi suam gratiam,
Me tollens a periculis.
4. Petrus, forma sanctitatis,
Me defendat a peccatis
Et in regno claritatis
Ponat et tunc erit satis.

5. O Petre, dux ecclesiae,
Sordes meae miseriae
Aufer, pastor egregie,
Da mihi bona gloriae.

6. O Paule, doctor gentium
Et speculum credentium,
In coetum contemplantium
Me duc et congaudentium.

7. O Andreas, Petri frater,
Christi primicerius,
Esto mei, quaeso, pater,
Dans mihi cor purius.
8. Tu qui de fonte bibisti
Omnis sapientiae,
Et idcirco tu scripsisti
Ordine scientiae,

9. Suscipi, Johannes, sine
Preces meas, obsecro,
Quia tibi sine fine

Corpus meum consecro.

10. Jacobus, Johannis frater,
Zebedaei filius,
Sit istius domus pater
Et custos egregius.

11. Philippus, lampas lucida,
Haereticorum stimulus,
Sit mihi stella fulgida
Et gratiarum cumulus.

12. O Bartholomaee fortis,

Magne Christi praedicator,
Trahe me de portis mortis,
Ut sim coeli habitator.

13. O Thomas, magister docte,
Qui non cito credidisti,
Tolle me de faecis nocte,
Firmans me in fide Christi.

14. Homo lucis, o Jacobe,
Alphaei clare fili,
Fac, ut non loquar improbe,
Sed cum modo subtili.

15. O Matthaee, scriptor Dei,

Mundi qui sprevisti vana,
Esto memor semper mei
Atque mentem meam sana.

16. Fratres Simon et Thaddaeus,
Vestro conjuncti agmine,
Spiritus ut, prestent, meus
Sit in superno cardine.

17. O Matthia, sorte datus
Domini credentium,
Fac, ut non sim elongatus
A coetu gaudentium.

18. O Johannes, qui tinxisti
Corpus Christi nitidum
Et manum imposuisti
Super caput lucidum.

19. Tinge, lava mentem meam
Ab omni spurcitia,
Ut laudare Deum queam
Cum omni laetitia.

20. O Johannes, qui fuisti
Jesu Christi praevius,
Et Johannes, qui scripsisti
Ceteris sublimius,

21. Gubernate nos studenter
In hoc mundo labili
Et portate nos laetanter
In regno laudabili.

22. O Maria Magdalena,
Speculum ecclesiae,
Fac ut mea mens sit plena
Odoris et gratiae.

23. Michael, qui pugil fortis
Diceris et vincis bella,
Me deduc in coeli hortis,
Ut evadam mortis fella.

24. Gabriel, qui Iactus venis
Consolari flebiles,
Esto mihi custos lenis,
Ut sim inter humiles.

25. Raphael, qui medicina
Diceris dominica,
Plagas meas manu bina
Sanans me laetifica.

26. Marce, fili Petri ducis,

Nos alumnos, quos deducis,
Redde fortes signo crucis
Et consortes summae lucis.

27. O Lucas, lucis portitor
Et animarum medice,
Sis nobis lucis janitor
Et cura nos pacifice.