139.

De Beata Maria V.

"Infra tempora Adventus".

1 a. Collaudemus venerantes
Nostri regis adorantes
Christi matrem virginem,

1b. Quae angelo nuntiante
Simul atque salutante
Profert Deum-hominem.

2 a. Salutatur et miratur,
Gratulatur, sed turbatur
Salutante nuntio.

2 b. Ait enim salutanti,

Verbum patris nuntianti:
Quae haec salutatio?

3 a. Ne timeas, o Maria,
Dei patris te sophia
Plenam fecit gratia ;

3 b. Concipies et paries,

Sed dolorem non senties,
Patrem paris filia.

4 a. Nomen eius sic vocabis,
Mundo quem tu generabis:
Iesus, salus saeculi.

4b. Erit magnus et immensus,
Quem non capit ullus sensus,
Sed exspectant singuli.

5 a. Sedem David, patris sui,
Dabit nato ventris tui
Deus, pater caelicus.

5 b. Domo Iacob regnaturus
Est, qui mundo collaturus
Dona sancti spiritus.

6 a. His auditis perterrita

Virgo, viro incognita,

Verba reddit talia:

6 b. Et quomodo fiet verum,
Quod nec ordo poscit rerum,
Cum sim viri nescia?

7 a. Ad haec fortitudo Dei
Non insciens sacrae rei
Voce refert placida:

7 b. In te Deus habitabit,

Mundum totum qui salvabit
In virtute valida.

8 a. Verbum, quod in principio
Erat, Dei consilio
Est in tuo corpore;

8 b. Et, quod fuit sempiternum,
Venit in te, cor maternum,
Sed in novo tempore.

9 a. O ancilla humillima,
Dei mater sanctissima,
Te precamur seduli,

9b. Miserere peccatorum,

Quae peccati nescis thorum,
Paris regem saeculi.