131. De beata Maria V.

1. Iam praestolantes gloriam,
Victoriam,
Surgite,
Clara dies illuxit,
Atram noctem destruxit,
Et nebula propellitur
Et umbra terrestris.

2. Nam mystice quem ceperit,
Hunc peperit
Maria,
Caelorum verum lumen,
En, pneumatis per numen,
Cui dixit Gabriel
Angelus caelestis:

3. O virgo venerabilis,
Laudabilis
Regina,
De stirpe David orta.
Tu vera caeli porta
Cunctis te laudantibus
Precibus praecelsis.

4. Trinitatis triclinium,
Tu filium
Vestisti
Patri [Deo] oboediens,
Paraclito consentiens ;
Huic sit laus et gloria
Per aeterna saecula.

R Ave, ave, gratia plena,
Dominus tecum,
Concipies et paries
Verbum patris altissimi;
Et verbum caro factum est,
Nobiscum est
Et manet in aeternum.