Sermo XIII .

Item, sermo fratris Bonaventurae Parisius, coram rege et familia.

Vidim us stellam eius in oriente et venimus adorare eum, matthaei secundo .

Magi hi, primitiae gentium salvandarum, in his verbis duo faciunt i primo enim in ipso Puero nate confitentur omnipotentiam creatricem, cum dicunt: Vidimus stellam eius in oriente, id est, quam creavit ipse cunctorum Creator; secundo confitentur in ipso sapientiam gub ernatri cem , propter quam dicunt: et venimus adorare eum, sicut qui cuncta gubernat.

Circa haec notandum, quod stella praecedens Magos sapientes et devotos octo conditiones differentes ab aliis stellis habebat, in quibus octo sacramenta spiritualia contineri advertere poterant, quibus trahentibus ad Christum currebant, et hodie debet currere omnis homo sive omnis devota anima. Nam stella illa ex sua novitate , quia de novo creata erat, demonstrabat per Christum natum universalem mundi renovationem; Numerorum vigesimo quarto: Orie tur st ella ex Iacob, et consurget virga ex Israel etc

Ex insolita claritate, quia de die sicut de nocti lucebat, demonstrabat aeternae sapientiae universalem per eum mundo irradiantiam; primae ad Corinthios decimo quinto: Stella a stella differt in claritate

Ex miranda magnitudine, quia maxima apparebat, demonstrabat nati maiestatem et humanitatis eius futuram exaltationem; matthaei secundo: Videntes autem stellam, gavisi sunt gaudio magno valde,

Ex sua vicinitate, quia prope in aere stabat, demonstrabat ipsius pietatem sive fontalem condescensionem; matthaei secundo : Et ecce, stella, quam viderant, antecedebat eos, usque dum veniens staret supra, ubi erat Puer.

Ex sua regularitate, qua ordinate incedebat, demonstrabat ipsius nati conversationis sanctitatem et religionem et ordinem; Ecclesiastici quinquagesimo: Quasi stella matutina in medio nebulae et quasi luna plena in diebus suis lucet, et quasi sol refulgens, sic ille effulsit in templo Dei.

Ex sua singularitate, qua non habebat similem suae naturae, gratiae, doctrinae et famae, demonstrabat ipsius claritatem incomparabilem; Apocalypsis ultimo : Ego sum radix et genus David, stella splendida et matutina.

Ex sua gratiositate et venustate demonstrabat suae innocentiae et gloriae pulcriformitatem inaestimabilem; Iob trigesimo octavo: Nunq uid producis luciferum in tempore suo et vesperum super filios terrae consurgere facis?

Ex pueri et crucis forma sive repraesentatione secundum Chrysostomum narrantem super Matthaeum ,

qui hoc dicit se in quibusdam apocryphis invenisse, non quidem fidem destruens, sed potius delectans, ut dicit ipse

demonstrabat suae innocentiae perfectionem et passionis fructum medicinalem; Apocalypsis secundo : Dabo illi, scilicet populo christiano, dicit Deus Pater, stellam matutinam, per influentiam efficacem et fructum universaliter utilem.