143. De Beata Maria V.

1 a. Pia mater salvatoris,
Te caelestis stilla roris
Plenam fecit gratia.

1 b. Nardus spirans, flos pudoris,
Tu es tui plasmatoris
Et mater et filia.

2 a. Vas virtutum, vas honoris,
Tua nostri des doloris
Levamen clementiae.

2 b. Iuxta crucem stans et plorans,
Caelo sis pro nobis orans
Et ferens subsidia.

3 a. Per te, clemens, sic laetemur,

Ut a sordibus privemur

Et hostis versutia ;

3 b. Fac nos sic te venerari,
Ut possimus collocari
In caelesti patria.