146. De sancta Aldegunde.

1. Gaude, felix Aldegundis,
Juventute quod recondis

Corde Dei monita.
Matris vultum non confundis,
Sed propositum abscondis

Spernens carnis libita.
2. Gaude, praesulum edocta,
Dictis sed intus excocta

Caritatis facibus ;
Claustrum fabricas ancillis
Christi, sed ministras illis

Humilis humilibus.
3. Gaude, quod tu preces fundis,
Flumen transis manans undis,

Siccis tamen pedibus ;
Vultum lacrimis perfundis,
Carnem macerando tundis

Studens Dei laudibus.

4. Gaude, cujus vita digna
Declaratur per tot signa

Collata divinitus;
Tibi fert columba velum,
Novit terra, prodit coelum

In te dona spiritus.
5. Gaude, quia nunc jucundis
Compar es et laetabundis

Angelorum coetibus ;
Hostis nostri furibundis
Per te ruptis vinclis condis

Nostris pacem cordibus.

6. Ergo maris in profundis
Nobis adsis, o patrona,
Servans a naufragio,
Ut promissa corde mundis
Dentur nobis vera bona
Patronae suffragio.