153. De Beata Maria V.

1. Illustrator cordium

Fit nostrae propaginis,

Salutis exordium

Compictor imaginis.

2. O res nova, mirabilis!

Rosa fraglat lilium,

Ignara viri seminis

Virgo profert filium

3. Hanc domum, portam, tumulum,

O Maria, visita,

Carnis nostrae simillima,

Ad veram vitam excita.

4. Ave, mater gratiae,

Solamen miserorum,

Speculum munditiae,

Purgamen immundorum.

5. Nobile triclinium,

Tu forma virginalis,

Deitatis scrinium

Et flos imperialis.

6. Nunc rore plena gratiae

Nubesque luminosa,

Canticum laetitiae,

Restaura ruinosa.

7. Et vinculum malitiae

Dissolve, dominatrix,

Caelesti militiae

Coniunge, mediatrix.

8. Sis nobis propitia,

Diva pietatis,

Solve nostra vitia,

O decus castitatis.

9. Karitatis vinculo

Nos semper constringe

Et caritatis viscera

Nos indue benigne.

10. Emulos nos facias

Verae castitatis,

Amatores facias

Christi paupertatis.

11. Casta virgo et regina,

Mater salvatoris,

Serva nos a tristi nece

Omnibus in horis.

12. Karbybdis malitiae

Nos nunquam involvat

Et orcus miseriae

Nos non deprehendat.

13. Eia, virgo regia,

Rivus fluens melle,

Tua per suffragia

Mala procul pelle.

14. Nunc virtutum regula,

Genetrix benigna,

Cuncta prece sedula

Comprime maligna.

15. Salve, regis gentium

Sponsa Sunamitis,

Sitim pelle mentium,

Radix verae vitis.

16. Tuum nobis iugiter

Assit consolamen,

Ac in morte firmiter

Prosit adiuvamen.

17. O Christi puerpera

Dulcis et patrona,

Nos peccantes repara

Auferendo vana.

18. Regina dulcis, filium

Pro nobis tunc exora,

Quando suum stimulum

Mors offert sine mora.

19. Fac, o pacis vinculum,

Virgo singularis,

Ut tergantur crimina,

Portus salutaris.

20. Fiat et per gratiam

Nostri salvatoris,

Ut sis piatrix criminum

Pultrixque maeroris.

21. En, tu sole pulchrior

Stella matutina,

Nos famulantes tibi

Serves a ruina.

22. Rogamus ergo supplices

Te, flos virginitatis,

Nam portus indulgentiae

Es, forma sanctitatis.

23. Da nobis tuam gratiam,

Gratiae pincerna,

Ad tuendum propera,

Mergamur ne inferna.

24. Es radix odorifera,

Veniae lucerna,

Purga nos, puerpera,

A labe veterna.

25. Suavitatis poculo

Venenum depellis,

Quod immittit astutia

Maligni versipellis.

26. Te fatemur dominam

Reginamque caelorum,

Secerne nos a loculis

Et poenis infernorum.

27. Regis habitaculum,

Domini Messiae,

Salva nos in stadio

Praesentis huius viae.

28. Ave, o ficulnea,

Dans signum aestatis,

Ad verna aetherea

Duc nos cum beatis.

29. Virgo admirabilis

In conditione,

Assis tuis famulis

Cum protectione,

30. Benigna tu defensio

Tuorum devotorum

Atque salus omnium

Et mater orphanorum.

31. In hoc ergo corpore

Et mundi procellis

Lites aufer cordium

Et finem pone bellis.

32. Nostra nunc precamina,

Virgo, fac iucunda

Christo tuo filio,

Fac corda nostra munda.

33. Gaude, nostrum gaudium

Atque consolamen,

Patronam nunc rogamus

Mentis per nictamen

Carnis post excidium,

Ne remoriamen

Facias, sed hostium

Vim repellas. Amen.