149. De Angelo Custode.

1. Angelorum dominum,
Regem coeli gloriae,
Genus laudet hominum
Oris et memoriae
Devote famulatu.
2. Non retardet reddere
Deo quisque exsulum
Grates, qui in carcere
Suum fovet populum
Sollicito conatu.
3. Gratum cuivis socium
Dedit in auxilio,
Angelum, qui taedium
Nostrum in exsilio
Soletur et laborem.

4. Eja, coeli accola,

Dux et vitae semita,
Hostis suasa subdola
Veteris praecipita,
Gravamen et terrorem.
5. Luxus carnis macera,
Pigritantem erige,
Non me trahant scelera,
Totam vitam dirige

Secundum tuum morem.
6. Vestem aptam nuptiis
Juva cito confici,
Ne sordentem vitiis
Me contingat projici
Praesentia divina.

7. Spreto mundo tendere
Coge me ad requiem,
Ut, quam cernis, cernere
Tecum possim faciem
Paternam sine fine.