CAPUT XIV.

De origano, hordeo, orobio, orpino, et oximine, et oculo porci.

ORIGANUM est herba rubentem habens stipitem, folia non magna fere sicut basilicon majus, florem rubeum et granum suum profert in modum coronae. Virtutes autem ejus sunt sicut virtutes hyssopi domestici : et est odor ejus multum acutus, sed fortius silvestre quam hortense.

Est autem calidum et siccum, et est resolutivum et carminativum et subtiliativum et adustivum aliquantulum, et est vehementis abstersionis : et in ipso est acuitas. Est etiam bonum concavitati dentium, confert doloribus aucharum, masticatum sedat dolorem dentium, et sanat fluxam gingivam, propter adustivam suam virtutem, confert hepati et stomacho, provocat urinam et menstrua, et interficit ascarides.

Hordeum est granum, cujus herba est calamus cum nodis, sicut et calami alii : sed calamus ejus est grossior et latioris folii quam alicujus alterius bladi. Spica autem est spinosa, quia in quolibet grano. Est autem longissima spica aequalis magnitudinis per totam longitudinem suam, et suum proprium est grana non habere in siliqua : sed. nuda stant in spica sua quodlibet habens suam sedem per quam trahit nutrimentum a calamo suo. Est autem granum album magnum longum in utraque parte acutum : sed superius est acutius propter calorem qui exspiravit superius in lineam longam spinalem : et cortex ejus est albus durus grossus propter sui terrestreitatem materialem, et decoctionem caloris. In ipsa autem est farina, et non est ita subtilis sicut farinae aliorum granorum, sed est grossior et grossioris commixtionis.

Dicit autem Avicenna, quod siligo est species hordei praeterquam in cortice : et forte dixit hoc propter ventositatem quae est in utroque : sed in aliis non habet similitudinem, nec in figura, nec in sapore.

Est antem granum hoc frigidum et siccum, et in ipso est abstersio : et ejus nutrimentum minus est nutrimento tritici. Aqua autem hordei est nutribilior quam substantia ipsius. Aqua autem siliginis est humidior quam hordei. Omnis autem aqua siliginis et hordei est inflativa : tamen potus melior nullus invenitur infirmis quam hordei aqua, quae ptisana vocatur : quia humectat arefacta, et exstin- guit incensa, et restaurat deperdita, et confortat debilia in infirmo : et in emplastris diversis utilis est hordei farina : et tamen .aqua ejus est mala stomacho propter frigiditatem, et ad alia multa praeparatur a medicis.

Orobium est herba quae a quibusdam vocatur vicia avium, et habet figuram in folio crure et anchis vicia), et in flore similiter : sed laxa seminis ejus non est adeo longa sicut viciae, et valet contra venenum. Est autem delectabilissimus pastus boum, ita quod hos cum jucunditate comedit ipsum : propter quod Heraclitus dixit, quod " si felicitas esset in delectabilibus corporis, boves felices diceremus cum inveniant orobium ad comedendum. "

Orpinum est herba quae communiter crassula vocatur : habet autem folium quasi mentastro simile, et est in quantitate mentaslri, frigida et humida existens, quae circa augem solis collecta, hoc est, in vigesimo gradu Geminorum, vel parum ante, vel post abscissa, diu erigitur suspensa in aere sine terrae nutrimento : et sicca etiam parte una convalescit in altera si plantatur : et hoc contingit propter viscositatem humidi sui naturalis, ex quo spiritus vitalis non de facili exspirare potest. Valet autem calefactioni hepatis, et infrigidat vehementer, et obscurat visum, et abscindit urinam et menstrua, et impedit coitum, et minuit pollutionem.

OXIMEN est herba quaedam quae si statim dum seminatur perfundatur, pullulat cito.

Oculus porci est flos, qui flos campi vocatur crescens in altis locis siccis juxta vias, habens radicem delectabilem : propter quod comeditur, et a porcis in pastum effoditur, et habet stipitem parvum altum, in cujus supremo est flos rutilans ipse multum, et exsiccatus retinet eumdem colorem. Folia autem habet parva et stricta, et profert florem in theca valde fusca : est autem siccus et calidus temperate.