157.

R Haec festa natalia
Recolit ecclesia.

1. Virgo parit filium,
Salvatorem omnium,
Qui non animalium
Abhorret praesepia.

2. Angelus haec loquitur,
Pastoribus dicitur:
De virgine nascitur
Rex gubernans omnia.

3. Vili panno tegitur,
Orbis a quo regitur,
Legi cujus subditur
Coelestis harmonia.

4. Lege circumciditur,
Nomen ei ponitur
Jesus, quo salvabitur
Credulus per saecula.

5. Stellam magi viderant,
Rege nato properant,
Reverti promiserant
In Herodis curia.

6. Invenitur, quem quaerunt,
Aurum, thus myrrham ferunt.
Ista nato offerunt
Mystica signantia.

7. Angelo praemoniti
Spreti regis invidi
Semitam per aliam
Redeunt ad propria.

8. Baptizari voluit,

Pneuma sanctum adfuit,
Vox patris intonuit
Huic testimonia.

9. Nuptiis interfuit,
Aqua, vinum profluit,
Sic ejus innotuit
Et omnipotentia.

10. Hinc ad templum geritur,
Simeoni sistitur,
In cujus suscipitur
Ulnis cum laetitia.

11. Duodenus perditur,
In templo congreditur
Doctis, et convincitur
Eorum ignavia.

12. Hoc sacro solemnio,
Vocibus et organo
Iubilemus gaudio
Angelorum Domino.