150. De sancta Austreberta.

1. Solemni jubilo virginis annua
Supplex concelebret concio gaudia,
Quae carnis hodie nexibus libera
Cum sanctis scandit sidera.

2. Austreberta Dei praedita gratia,
Mundi despiciens celsa palatia,
Stravit sub pedibus fortiter omnia
Quaerens sola perennia.
3. Terreno fugiens conjugi nubere
Sponso sidereo nupsit in aetbere,
Cui cum virgineis obvia coetibus
Sacris concrepat laudibus.
4. Hujus nos meritis rex Deus audiat,
Hujus praesidium gens sua sentiat,
Hujus quotidie sacra precamina
Tergant nostra peccamina.

5. Sit patri ingenito cunctipotentia,
Sit ejus genito magnificentia
Amborumque sacro gloria flamini,
Laus omnis trium numini.