157. De Beata Maria V.

1. Ave, Maria,

Tua mihi memoria
Dulcis sit super omnia.

2. Sermonem

De te libens habeo,
Sed culpas meas timeo.

3. Ergo tu, sanctissima,
Peccatorum spes unica,
Conforta tuum famulum,
Ut tibi dicat canticum.

4. O Maria,
Pia et benigna,
Tu mater es et filia,
Tu patris sapientia,
Tu filii laetitia
Et trinitatis gloria.

5. O Maria,

Tu caeli regina,
Tu spes, tu medicina
Tu stella matutina
Et rosa sine spina.

6. O Maria,

Tu sponsa, tu thalamum,
Tu solis habitaculum,
Tu forte propugnaculum,
Hostis non timens vinculum.

7. O Maria,

Tu datrix gratiae,
Tu fons misericordiae,
Tu custos innocentiae
Et speculum munditiae.

8. O Maria,

Tu sidus clarum,
Tu medela animarum,
Tu puteus aquarum
Et hortus deliciarum.

9. O Maria,

Tu thronus Salomonis,
Tu rubus visionis,
Tu vellus Gedeonis,
Tu plena caeli donis.

10. O Maria,

Tu virgula fructifera,
Tu planta salutifera,
Tu gemmula lucifera,
Tu nardus odorifera.

11. O Maria,

Tu dulcis et [mitis]
Fecundissima vitis,
Tu via regni caelestis,
Tu arca albae vestis.

12. O Maria,

Tu tota formosa,

Tu legis glosa,
Tu stirps generosa
Et felix puerpera.

13. O Maria,

Tu flos candens,
Tu gemma resplendens,
Tu stella clarificans
Et sidus irradians.

14. O Maria,

Tu tutum refugium,
Tu scutum debilium,
Tu sanctitatis lilium
Et vas virtutum omnium.

15. Quid dicam plus, Maria?
Tu sancta amica,
Tu vera concordia;
Scis, quod potes omnia.

16. Ergo, virgo virginum,
Placa tuum filium,
Ut post vitae terminum
Ducat ad caeli gaudium.