152. De sancto Aegidio.

1. Sancti merita Aegidii inclita,

2 a. Verendae sanctitatis

ac monachorum praesulis,

2 b. Pro posse atque nosse
organa nostra concrepent.

3 a. Sedulas laudes

quoque semper feramus

3 b. Tanto patrono

ac digno sacerdoti.

4 a. Illius exortus est ductus
ex nobili genere ;

4b. Huius pater fulsit virtute,
Theodorus nomine.

5 a. In fide christianissimus
est dictus ille genitor;

5 b. Hinc genetrix eius noscitur
et Pelagia humilis.

6 a. Athenarum civitas
docilis fovit filium,

6 b. De quo gaudet sanctaque
iubilat nunc ecclesia.

7 a. Disciplinae mancipatus,
puerilia

transcurrens, subtilibus
studuit.

7 b. Collaetare condignanter,
Graeca natio,
quae comportasti talem
et tantum.

8 a. Iuvenili aetate stratus
pneumatica
informatur doctrina,

8b. Ut conmagistrum et doctorem
pusionem
omnes scirent imbuti.

9 a. Crevit virtute,

dum iuvenilem duxit
aetatem.

9 b. Tunicam dedit
pauperi obvianti
puero.

10 a. Signis claruit
multis, antequam
monachicam vitam
duxerat ;

10 b. Praeclaruit
multimodaque
virtutum habitu
copia.

11 a. Sophiam despexit humanam,
nactus est
Aegidius sed angelicam.

11b. Ipse fide subnixus vera
confracta
scit redintegrare integra.

12 a. Ipse hodie
nos servulos
suos donet munere
angelico,
veniam
implorando a Christo ;

12 b. Ipse hodie
ad caelorum
gaudia digne ductus
et civibus
caelorum
est iunctus pro meritis,

13. Quo ipse gloriosus triumphat.