QUAESTIO III.

Utrum verum sit objectum Metaphysicae?

Aristot. hic cap. 2. D. Thom. lect. i. Flamina, quaest, ult. artic. 1 . Fonseca, cap. 2. Vide auctores cit. ante quaest. 5. lib. 2.

Arguitur quod non, quia Metaphysica cum sit prima scientia et communissima , maxime videtur esse circa primum objectum scibile: primum autem objectum scibile vel intelligibile videtur esse ve-rum, quia non videtur aliud posse poni, quod omnibus intelligibilibus conveniat, et quod sit distinctum objectum contra objecta aliarum potentiarum. Confirmatur illa ratio per Philosophum 2. Metaphys. text. com. 3. dicentem, vocari Philosophiam veritatis scientiam, recte habet. Item, unumquodque sicut se habet ad esse, sic ad veritatem, 2. Metaph. text. com. 4. ergo convertitur cum ente: ergo pertinet ad scientiam de ente. Item, si verum excluderetur, hoc non esset isi quia dicit ens diminutum, sed hoc est falsum. Probatio, nam quae diminuunt de perfectione entis, non attribuuntur primo enti, ut patet de causato, finito, etc. sed verum attribuitur Deo, et in summo, unde 2. Metaphysic. text. comment. 4. sempiternorum principia esse verissima necesse est. Item, si dicatur debere intelligi de vero, quod est in compositione et divisione.

Contra, a quo non excluditur consideratio causae, nec effectus ; ista autem veritas est effectus realis entitatis, juxta illud in Praedicamentis : in eo quod res est, vel non est oratio vera, vel falsa est. Responsio, res non est causa praecise veritatis in intellectu, sed intellectus componens praedicatum cum subjecto.

Ad oppositum est Aristoteles in littera.