Sermo VI .

Item, sermo fratris Bonaventurae apud sanctam Irenaeum de Lugduno.

Ut perfecerunt omnia secundum Legem Domini, reversi sunt in Galilaeam, Lucae secundo .

In verbis his ad exemplum nostrum mystice sumtis duo notantur, scilicet vitae activae salutaris adimpletio, et vitae contemplativae deiformis prosecutio. Primum, ibi: Ut perfecerunt omnia secundum Legem Domini; secundum, ibi: reversi sunt in Galilaeam.

I. Quantum ad primum notandum est, quod ad perfectionem activae lex divina dictat quaedam fugienda, ut mala culpae; quaedam facienda, ut bona iustitiae; quaedam toleranda, ut mala poenae; quaedam exspectanda, ut bona gloriae; ideoque ad eius perfectionem quatuor sunt necessaria, scilicet sanctimonia in fugiendis, ut perficiatur lex sanctitatis; Numerorum sexto : Offeret Nazaraeus, iuxta quod mente devoverat, ad perfectionem sanctificationis suae.

Obedientia in faciendis, ut perficiatur lex caritatis; Isaiae trigesimo octavo: Obsecro, Domine, memento, quaeso, quomodo ambulaverim coram te in veritate et in corde perfecto.

Patientia in tolerandis, ut perficiatur lex libertatis; Iacobi primo: ''Patientia opus perfectum habet, ut sitis perfecti et integri, in nullo deficientes.

Fiducia in exspectandis, ut perficiatur lex aeternitatis; Psalmus : Sicut luna perfecta in aeternum et testis in caelo fidelis.''

II. Circa secundum nota, quod qui ad gradus contemplationis revertitur venit quasi per scrutinium propriae conscientiae, quod parat mentis tranquillitatem ; Threnorum tertio : Scrutemur vias n ostras et quaeramus et revertamur ad Dominum.

Per obsequium almae reverentiae, quo honorat Dei maiestatem; Ieremiae trigesimo primo: Statue tibi speculam, dirige cor tuum in viam rectam, i n qua ambulasti; revertere, virgo Israel etc.

Per circuitum summae sapientiae, quo investigat aeternam veritatem; Isaiae trigesimo octavo : Reversus est sol decem lineis per gradus, quos descenderat etc.

Per amplexum divinae praesentiae, quo degustat caelestem suavitatem; Iob vigesimo secundo: Si reversus fueris ad Omnipotentem, deliciis afflues et elevabis ad Deum faciem tuam.