160. De Beata Maria V.

1. Salve, decus feminarum,
Expiatrix nequitiae,
Universis sidus clarum,
Regnum inaurans gloriae.

2. Regis regum mater cara,
Errantium consolatrix,
Gaude, felix stella clara,
Nostra o auxiliatrix.

3. Ave, palma fructu pleno
Virtutisque cellarium,
Lava sordes, o amoena,
Dulcis rosa, solsequium.

4. Evae mortis commutatrix,
Ductrix tuta mortalium,
Expia, potens oratrix,
Labem, culpam et vitium.

5. Ad te curro, spes unica,
Gaudium summis et imis,
Alma proles Davidica,
Reum me excuses nimis.

6. Duc me, precor, ad superna
Collegans caeli civibus
Cordisque purga interna
Malis et vitiis omnibus.