156. In Translatione s. Agathae.

1 a. Eia, fratres, personemus
regi regum cantica

1 b. Imitantes melodia

superos harmonica.

2 a. Hac in die martyris sunt
Agathae sollemnia,

2b. Liberari prece cuius

creditur haec patria.

3 a. Nostra cuius festum iure
percolit ecclesia

3 b. Sublimata pro ipsius
corporis praesentia.

4 a. Lugens illam te fateris
amisisse, Graecia,

4 b. Quam se gaudet assecutam
Trinacris provincia.

5 a. Nostrum fuit, quod habemus ;
cur ex istis invida?

5 b. Tu furaris omnes sanctos,
sed non inde perfida.

6 a. Tuque gaude speciali
gaudio, Catania,

6 b. Gaudiique tui melos
temperet modestia.

7 a. Absit luxus et, quae mundum
vorat, avaritia ;

7 b. Iam abunde regnat in his
satanae malitia.

8 a. Absint fastus, qui seductos
pertrahunt ad vitia,

8 b. Et salvatrix Christo dante
nobis assit gratia.

9 a. Qua docente nostrae carni
mens exsistat domina

9 b. Et iuvante premat eius
fortiter molimina.

10a. Pax tranquillet et conectat
parilis concordia

10 b. Sic astantis et ovantis
populi praecordia.

11a. Virgo nitens atque potens
imperatrix, Agatha,

11b. Cuius nomen penetravit
orbis huius climata,

12 a. Ora sponsum, tuis facta
servulis propitia,

12b. Det ut nobis, quibus gaudes,
adipisci gaudia.