157. De sancta Agnete.

1 a. Salvatori iubilemus
Et devote praedicemus
Ipsius magnalia ;

1b. Agnum Dei veneremur
Et Agneti collaetemur
Solemni laetitia.

2 a. Agnum Agnes amplexatur,
Agnum laeta comitatur
Inter pacis lilia;

2 b. Sponsum amans vere vivum
Sponsum spernit corruptivum
Et eius sponsalia.

3 a. Dum intendit scbolae morum,
Luxus cavet lascivorum
Et mundi ludibria;

3 b. In aetate primitiva,
Carnis terit incentiva,
Pudoris naufragia.

4 a. Castitatis compta lauro
Fide fulget velut auro,
Fide vincit omnia;

4 b. Mundus ille iam vilescit,
Mente votoque liquescit
In sponsi cellaria.

5 a. A quo sumpsit mel dulcoris
Et insigne lac pudoris
Et musta rubentia;

5 b. Haustu sacro rubent genae
Caput lenit iugum lene,
Crucis Christi gloria.

6 a. Adulescens mentis dirae,
Auctor doli, fomes irae,
Vitiorum facula,

6b. Agnem quaerit occupare,
Agni thorum maculare,
Agni sine macula.

7 a. Sed non cedit blandimentis
Nec succumbit in tormentis
Fidelis virguncula;

7 b. Reddit Christo dignam vicem,
Dum pro Christo dat cervicem
Ad mortis pericula.

8 a. Agno Dei laus aeterna

Et Agneti lux superna

Per aeterna saecula;

8 b. Det et nobis per Agnetem
Pacem Christus et quietem
Post vitae curricula.