Sermo I.

Item, sermo fratris Bonaventurae in Octava Epiphaniae, apud Massiliam.

Ecce, Agnus Dei, ecce, qui tollit peccatum mundi, Ioannis primo .

Venerabilis et sacer Baptista in his verbis commendat Verbum incarnatum a summa innocentia et benignitate ostensive, et universali et plenaria utilitate demonstrative. Primum demonstratur in agnina praefiguratione, secundum in peccatorum mundi ablatione.

I. Notandum ergo, quod Christus fuit vere Agnus anniculus propter humilitatem angelicae conversationis; immaculatus propter sinceritatem integerrimae incorruptionis; mansuetus propter tolerantiam acerbissimae passionis.

In quantum autem Agnus anniculus, dedit se nobis in solatium peregrinationis; Apocalypsis decimo quarto : Vidi supra montem Sion Agnum et cum eo centum quadraginta quatuor millia habentes nomen eius etc.

In quantum vero Agnus immaculatus, dedit se nobis in cibum refecti onis; Apocalypsis septimo : Agnus, qui in medio throni est, reget illos et deducet eos ad vitae fontes aquarum.

In quantum etiam Agnus mansuetus, se pro nobis dedit in pretium redemptionis; Ieremiae undecimo: Ego quasi agnus mansuetus, qui portatur ad victimam etc.

II. Tulit vero peccata mundi abluendo maculas abominabiles, quia Agnus immaculatus; Apocalypsis primo : Dilexit nos et lavit nos a peccatis nostris in sanguine suo.

Auferendo reatus miserabiles, quia Agnus anniculus; Isaiae quinquagesimo tertio: Ipse peccata multorum tulit et pro transgressoribus rogavit.

Remittendo offensas inexcusabiles, quia Agnus mansuetus; ad Ephesios primo: Gratificavit nos in dilecto Filio suo, in quo habemus redemptionem per sanguinemeius , remissionem peccatorum secundum divitias gratiae eius.