161. De sancto Benedicto.

1. Ave, pater et patrone,
Monachorum ductor bone,
Benedicte pater, ave,
Mihi peccatori fave.

2. Preces meas admittendo
Et obnixe deducendo
In effectum, quidquid peto,
Te accedo corde laeto;

3. Supplicando studiose,
Ut tu, pater gloriose,
Intcrcedas apud Christum,
Ne fallar per mundum istum ;

4. Et omne per me commissum
Ne me mergat in abyssum,
Sed ex toto poenitere
In hac vita et deflere,

5. Fac et demum praecavere,
Deum prae oculis habere ;
Ne delinquam rursus prave,
Cor ad Deum sursum trahe.

6. Corde, voce laudem Deum,
Reflectendo super eum
Omnes vires et conamen
Suum exorando nomen.

7. Ut excessus sic deplangam,
Ut non post hanc vitam longam
Pro peccatis feram poenam,
Invitari fac ad coenam,

8. Ubi nullus est defectus,
Ut ibidem sim electus,
Angelis conregnaturus
Et a malo sim securus.