166. De Beata Maria V.

1. Mater dulcis, nos dignare
Tua laude confirmare
Et virtute roborare ;
Ne in mundo hoc cadamus,
Te juvante evadamus,
Lapsi per te resurgamus.

2. Virgo dulcis parens,
Tactu viri carens,
Miro modo peperisti,
Deum caeli genuisti,
A quo facta tu fuisti,
Per quem virgo remansisti.

3. Tu in mundo es electa
Et ab ipso es protecta,
Cuius mater es dilecta.
O res mira, virtus Christi!
Illibata permansisti.

4. Natum tuum praemisisti,
Ad cuius dextram sedisti,
Quando mundum reliquisti.
Ibi semper veneraris,
Virgo prudens, et laudaris.

5. O quam pium est laudare
Dei matrem et amare,
Corde toto suspirare,
Quae laudantem protegit
Nec plorantem despicit,
Sed quasi mater respicit.

6. Virgo Dei piissima,
Ad me converte viscera
Et quasi mater filiis
Succurre cunctis servulis
Et fer iuvamen miseris.