161. In festo s. Andreae apostoli.

1 a. Corda manibus leventur
Et sonoris accendentur
Vocibus praecordia;

1 b. Adest dies, quo beatus
Hinc Andreas est vocatus
Ad caeli palatia.

2 a. Rete quondam laxans mari,
Dono tractus singulari
Fit piscator hominum,

2b. Uno praedicantis dicto
Gubernaculo relicto
Imitatus Dominum.

3 a. Hic dum verbum offert Dei
Signis pollens, mox Achaei
Dei credunt filio.

3 b. Furit tyrannus Aegeas,
Caesus flagris et Andreas
Damnatur suspendio.

4 a. Biduo perstans in poenis
Christum praedicat egenis
Spretis cruciatibus,

4 b. Et ne vivus cedat cruci,
Se commisit summo duci
Ferendum caelestibus.

5 a. Pectora tundentes rea
Rogitamus te, Andrea,
Alternatis precibus,

5 b. Ut exuti carnis mole
Mereamur vero sole
Frui cum caelitibus.