167. De Beata Maria V.

1. Collaudo te matrem Dei,
Laudo fructum ventris tui,
Sint benedicta viscera
Et tua sancta ubera,
Quae lactaverunt Dominum,
Aeterni patris filium ;
Qui non habet initium
In te sumpsit exordium.

2. Sit benedicta pietas
Et virtus et humilitas
Et tua pudicitia
In caelesti laetitia.
Ex toto corde et anima,
Mente et virtute mea.
Visceribus ventris mei
Collaudo matrem Domini.

3. O Christi mater Maria,
Iesum clementer invoca,
Ut ipsius conceptio
Sit vitae nostrae protectio.
Eius sancta virginitas
Et virtus et humilitas,
Baptisma atque passio,
Mors atque resurrectio

4. Sint et eius ascensio
Semper nostra defensio
De cunctis poenis inferi,
Anxietate saeculi.
Ex filii tui meritis
Et eius sanctis precibus
Sit in caelesti gloria
Mea perpetim anima.

5. In manus tuas, Domine,
Commendo omni tempore
Corpus meum et animam,
Quia redemptor meus es
Et mater tua mea spes.
De cunctis poenis inferi
Defendat me mater Dei.