162. De sancta Anna.

1. Ave, mater, Deo digna,
ave, mitis, dulcis et benigna.

2 a. Ave, pia laude

dignissima hominum,

2 b. Quia per te venit

salus, spes et gaudium.

3 a. In te, beata,

descendit caelestis gratia,

3 b. Quae te mundavit

ab omni carnis lascivia

4a. Et fecit dignam,

ut digna digne filiam
generares dignissimam,

4b. Quam,mater sancta,
tibi angelo Domini
nuntiante concepisti,

5 a. Et eam genuisti
cum honore
et gaudio,
o felix domina.

5 b. Sit illa benedicta
nativitas,
in qua mundus
est illuminatus.

6 a. O pia

mater Anna, laetare,
quia fuisti digna
portare Mariam,
praeclaram
virginem, summi
regis genetricem.

6 b. Te iure

fideles cuncti laudant

[et] felicem praedicant

et honorant, quia

per fructum

tuum ingressus

est mundi Dominus.

7 a. Tu es dignissima
laude et honore, o
mater melliflua.

7 b. Suscipe, domina,
tuorum fidelium
clementer carmina.

8 a. Et te laudantes
pie respice,
manum [tuam] porrige
in adversis ;

8 b. A cunctis purga
vitiis et fac

consortes [nos] supernis
deliciis.

9 a. Virtutibus cor illustra
et dirige
opera nostra.

9 b. In curia caeli sita,
ne deseras
nos in hac vita.

10 a. In horrenda mortis hora,
mater piissima,
nobis peccatoribus
indignis succurre
sine mora.

10 b. Adduc tecum prolem tuam
atque exercitum
sanctorum angelorum
cum ceteris caeli
primatibus,

11a. Ut in aspectu vestro
daemonum caterva
velut fumus dispergatur.

11b. Mater benigna, tu nos
ad vitam consigna
et intercede pro nobis,

12. Ut per te, pia domina,
cernamus in gloria
tuae natae filium,
qui salus est humilium.