Sermo III .

Item, sermo fratris Bonaventurae Fratribus de Lugduno, in Capitulo de mane.

Quodcumque dixerit vobis, facite, Ioannis secundo .

Virgo sacratissima, aeternae sapientiae familiare vas, his verbis nos instruit obedire Filio suo, Domino nostro, in sacris documentis et sacris suis dictis tripliciter, scilicet affectu universali, ibi: Quodcumque; affatu salutari, ibi: dixerit vobis; effectu laudabili, ibi: facite. Et vere, libenter audienda est quae tam raro locuta fuisse invenitur.

Circa totum nota, quod audiendus est Christus, Dei Filius, in suis doctrinis et dictis et consiliis tanquam Verbum, in quo dicta et per quod factasunt o mnia ; tanquam Verbum, inquam, bonum, secundum illud Psalmi; vivum, secundum illud Apostoli; salutiferum, secundum illud Actuum ; verax, secundum illud Ecclesiastici; iucundum, secundum illud Ieremiae ; aeternum, secundum illud Isaiae. In hoc enim Verbo, Dei Filio, sicut in primaria rerum conditione Deus creavit primam materiam tanquam omnium corporalium ultimum principium et fundamentum et in ipso distinguendo et ornando creata; unde plura verba postmodum dixit; sic per Verbum in reparatione unum verbum dixit informativum bonae voluntatis animae et eius universalis salutis tanquam spiritualis fundamenti collativum et fundativum, et alia verae verba vitae tanquam corporis et animae distinctiva salubriter et ornativa spiritualiter et perfectiva vel salvandiva sempiternaliter.

In principio enim, id est in Filio suo sive Verbo, creavit Deus caelum et terram, id est primam materiam, omnium corporum primarium fundamentum, Genesis primo . In Evangelio per Verbum suum dixit, Matthaei quinto: Amen dico vobis, donec transeat caelum et terra, iota unum aut unus apex non praeteribit a lege, donec omnia fiant, tanquam informativum bonae voluntatis universaliter, quae est fundamentum et materia omnium sacrorum operum.

In principio dixit, Genesis primo : Fiat lux, tanquam totius creaturae decorativa et acceptativa, in figura obedientiae sanctae, quae ad modum lucis se habet in anima. In Evangelio dixit, Matthaei quinto: Dico enim vobis, quia, nisi abundaverit iustitia vestra plus quam scribarum et Pharisaeorum, non intrabitis in regnum caelorum. Haec est obedientia , qua carebant Pharisaei

In principio dixit, Genesis primo : Fiat firmamentum in medio aquarum, in figura benignitatis, quae conservando pacem ex omni parte omnibus condescendit. In Evangelio vero, Matthaei quinto, dixit: Ego autem dico vobis, quia omnis, qui irascitur fratri suo, reus erit iudicio, propter crudelitatem, qua fratribus suis non parcit.

In principio, Genesis primo : Dixit Deus; Congregentur aquae, quae s ub caelo sunt, in locum unum, et appareat arida, in figura pudicitiae, quae omnes concupiscentias sepelit et concludit. In Evangelio dixit, Matthaei quinto: Ego autem dico vobis, quia omnis, qui viderit mulierem ad concupiscendum eam, iam moechatus est eam in corde suo, per impudicum affectum.

In principio dixit, Genesis primo : Germinet terra herbam virentem et facientem semen et lignum pomiferum faciens fructum iuxta genus suum, in figura veritatis, quae debet vivere in corde et ore et fructificare in opere. In Evangelio dixit, Matthaei quinto: Ego autem dico vobis, non iurare omnino etc; sit autem sermo vester: est, est; non, non; quod autem his abundantius est a malo est, per falsitatem.

In principio, Genesis primo : Dixit Deus : Fiant luminaria in firmamento caeli et dividant diem ac noctem, in figura caritatis geminae distinguentis bonos a malis. In Evangelio dixit, Matthaei quinto: Ego autem dico vobis : Diligite inimicos vestros, benefacite his qui oderunt vos, per dilectionem perfectam.

In principio dixit, Genesis primo : Producant aquae reptile animae viventis et volatile super terram, in figura patientiae, quae inter fluctus vivere facit et omnibus passionibus superfertur et volat. In Evangelio dixit, Matthaei quinto: Ego autem dico vobis, non resistere malo; sed si quis te percusserit in dexteram maxillam tuam, praebe illi et alteram.

In Verbo igitur suo bono fecit Deus lucem a principio et per idem dixit verbum obedientiae illuminantis in Evangelio. In Verbo suo iucundo fecit firmamentum in medio aquarum et per idem dixit verbum benignitatis conservantis. In verbo suo vivo congregavit aquas in locum unum et per idem dixit verbum pudicitiae congregantis. In Verbo suo salutifero fecit luminaria in firmamento caeli et per idem dixit verbum caritatis universaliter distinguentis. In Verbo suo aeterno produxit reptile animae viventis et volatile et per idem dixit verbum patientiae superferentis.

Quodc umq ue ergo dictum est sic in eo et per eum, secundum consilium Virginis affectu, affatu et effectu est implendum et faciendum.