167. De sancto Annone.

1 a. Gaude, felix Agrippina,
Quam patronis tot divina
Beat opulentia ;

1b. His translatis, illis stratis,
Iste in te sublimatis
Praesulatur gloria.

2 a. Revereri licet noris,

Omnes tamen sunt maioris
Patres reverentiae,

2b. Qui te Christo genuerunt
Et caelestis effecerunt
Coheredem patriae.

3 a. Inter quos, ut lux solaris,
Sparsit in te singularis
Anno decus radii ;

3 b. Fidem vulgi, normam cleri
Reformando libram veri
Dirigit iudicii.

4 a. Atrox malis bonis suevit

Misereri, quia crevit

Secum miseratio.

4b. Veste fretus cilicina,
Cuius erat in divina
Lege meditatio,

5 a. Stat invictus nec movetur,
Licet crebro molestetur
A malorum fremitu.

5 b. Imbres sedat verbo densos,
Curat caecos et suspensos
Solvit ab interitu.

6 a. Ut modernis det exempla,
Quinque struens dotat templa
Larga rerum copia.

6 b. Sanctos Dei persequentem
Palatium dat amentem
Prece caelo pervia.

7 a. Quem obumbrat celebrantem
Missas arasve sacrantem
Splendor lucis caelicae.

7b. Mala, quibus iam vexatur
Mundus, caelo speculatur ;
Ab orco horrifice

8 a. Sanctus migrat, quem sanctorum
Capsae cingunt patronorum,
Processu septemdii.

8 b. Navi datus per se citus
Rhenum transit, carpenslitus
Altioris fluvii.

9 a. Ut in curis languidorum
Et pressuris oppressorum
Dei dispensatio

9 b. Novi civis meritorum

Fascis pandit, malignorum
Cessat aemulatio.

10 a. O largitor omnis boni,
Tanti patris ac patroni
Salva nos intuitu,

10b. Ut psallamus cum beato:
Tibi patri sit ac nato
Laus cum sancto spiritu.