168. De sancto Ansgario.

1 a. Virtus sancti spiritus
Radiando caelitus
Informat Ansgarium,

1b. Quod fide catholica
Gens instructa Danica
Fiat pars fidelium.

2 a. In deorum cultibus
Et errorum fluctibus
Agitata Suecia,

2 b. Mundi stans in ultimo
Patri datur optimo
Illustranda gratia.

3 a. Regis dux empyrei
Margaritas fidei
Spargit infidelibus,

3 b. Pro catervis hostium
Caeli pandit ostium
Signis et virtutibus.

4 a. Iam conversi perfidi

Christum quaerunt fervidi
Totis desideriis ;

4b. Cessat cultus idoli,
Astat fides populi
Christi sacrificiis.

5 a. Christe, lux credentium,
Dulcis amor mentium,
Eius patrocinio

5 b. Da virtutis meritum,
Da salutis aditum
In perenni gaudio.