174. De Beata Maria V.

1. O regina caelorum,

Maria, domina angelorum,
Cum sis mater miserorum
Medicina et reorum,

2. Dele in me, quod peccavi,
Et reduc me, nam erravi,
Viam rectam nec agnoscens,
Precor te, sis mihi poscens

3. Veniam ad tuum natum,
Iesum Christum vulneratum
Pro me vili et indigno,
Duro fixum crucis ligno,

4. Passum in humanitate
Et non in divinitate.
Imploro te, virgo beata,
Ut sis mihi semper grata.

5. Advocata tu vocaris,

Pro me bona tunc loquaris,
Cum iudex iudicabit
Et omnes revocabit.

6. Tunc me salvum et securum
Facias, ne verbum durum
Audiam a causa dicti:
Ite [a me], maledicti,

7. Sed potius quod dicetur
Iustis, quando dividetur
Optimum a pessimo
Ab aeterno Domino.

8. Hoc praesta mihi, virtus patris,
Ob amorem tuae matris,
Quae te Christum parturivit,
Postquam ab angelo audivit

Procul omni fallacia:
Ave, plena gatia.