171. De sancto Antonino M.

1. Pangat

regi Deo arae tuba
nostra ovatizans

2 a. In hac celebri diecula,
laude inclita
semper ubique digna,

2 b. Nostra eminetque cantica,
caeli penetrans
convexa agalmata

3 a. Ac micans intra splendida

3 b. Caelestis aulae lumina.

4 a. Quam agoniteta
cuncta decorat
supra titanica

4 b. Fortis, mirifica
pollens gloria
in aeterna saecla.

5 a. Tyrannica
vesania,

vitalia reprobans
erogata semina,

5 b. Quem per dira
excruciat

quaestionum impia
stomachans supplicia.

6 a. Hic immania

passa poenarum agonia
in frusta dissecat
ense corporis cuncta
sacri viscera,

6 b. Quae et lacunas

iactat inter flumineas;
patuit procella
quibus dehiscens, sicca
dans hospitia.

7 a. Cives inde ab arce
assunt supera
mirifica praebentes
hic obsequia ;

claram praeparant carinam,
in qua capitis gestant
sacra pignora.

7 b. Effera atque saeva
sic gentilitas,
dum stupet elementa
famulantia

dumque cernit caelicolas,
facti paenitet vana
spernens idola.

8a. O Antonine inclite,
o sacer sancte,
o pater et fortis athleta,
dux et auriga,
tua sunt tibi lauta
praemia
cum iustitia
in caelesti curia;

8 b. Nos erilia tropaea
psallimus tua,
canoraque laude reboat
haec aula diva;
tu nos cum angelica
chorea

fac avere per
aevum laude aeterna.

9. Tibi Christus imperat
per sempiterna saecula.