176. De Omnibus Sanctis.

1. Miserere mei, Deus,
Miserere, factor meus,
Miserere, Iesu Christe,
Ne pereat reus iste.

2. Iesu Christe, miserere
Fac me digne paenitere,
Paenitenti mihi parce,
Hostes meos procul arce.

3. Propter tuam bonitatem
Habe de me pietatem.
De me pietatem habe,
Munda cor ab omni labe.

4. Mentem meam in te firma
Et gratiam mihi praesta,
Me non possum emendare,
Nisi velis adiuvare.

5. Precor ergo, Iesu bone,
Meas sordes tu depone,
Renova me veteratum,
Consolare me turbatum.

6. Eleva me corruentem,
Erige pigrum iacentem,
Ovem require errantem,
Dirige me deviantem.

7. Fac quietum me vagantem,
Sana, precor, aegrotantem,
Exaudi me te precantem
Et gratiam requirentem.

8. Pastor bone, rex benigne,
Ure me spiritus igne,
Ut ipsius per calorem
Noxium perdam torporem.

9. Virgo mater salvatoris,
Memor esto peccatoris,
Porta caeli, maris stella,
Pro me natum interpella.

10. Sancte chorus angelorum,
Omnes virtutes caelorum,
Apud Deum me iuvate
Et pro me semper orate.

11. Sancte chorus prophetarum,
Contio patriarcharum,
Exorate creatorem,
Ne me perdat peccatorem.

12. Sancte Iohannes baptista,
Audi vota clemens ista,
Agnum fac mihi placatum
In Iordane baptizatum.

13. Tu quoque, Petre beate,
Claves caeli cui sunt datae,
Pro me roga salvatorem,
Qui posuit te pastorem.

14. Paule, vas electionis,
Exemplum conversionis,
Ora tuum conversorem,
Ut meum tollat errorem.

15. Frater Simonis Andrea,
Ad te veniat vox mea,
Hanc ad aurem porta Christi,
Pro quo navem reliquisti.

16. Super ceteros dilecte
Et de nuptiis electe,
Custos Dei nimis care,
Pro me Christum deprecare.

17. Iacobe, Bartholomaee,

Philippe, Thoma, Matthaee,
Iacobe, Simon, Thaddaee,
Mementote precis meae.

18. Sancte chorus innocentum,
Mihi detis iuvamentum,
Qui fuistis moriendo
Testes Christi non loquendo.

19. Stephane Christi beate,
Propter Christum lapidate,
Quod orasti lapidanti,
Ora mihi supplicanti.

20. Martyr Domini Laurenti,
Certe plus ardens ardenti,
De thesauro pietatis
Opus auge caritatis.

21. Sancte Clemens, Sixte, Clete,
Precibus meis favete,
Sacerdos Martine Dei,
Supplicis memento mei.

22. Nicolae, praesul Christi,
Misero succurre isti,
Augustine et Gregori,
Subvenite peccatori.

23. O sancte Petre confessor,
Mihi fias intercessor,
Ita mihi subvenite,
Ut ad regnum ducar vitae.

24. Paule, Iohannes, Antoni,
Estote mihi patroni,
Sancte abbas Benedicte,
Custos mentis sis afflictae.

25. O vos omnes eremitae,
Votis meis assentite,
O Maria Magdalene,
Tu memoria me tene.

26. Agnes, Agatha, Lucia,
Scholastica, Caecilia,
Katherina, Margareta,
Me ducite ad roseta.

27. Vos, sancti et sanctae Dei,
Vestri mementote rei,
Me nautam in mundi salo
Servetis ab omni malo.

28. Sit laus patri creatori
Filioque salvatori,
Eandem habeat flamen
Per cuncta saecula. Amen.