162. In Nativitate Domini.

1. Ecce, novum gaudium,
Ecce, novum mirum !
Virgo parit filium,
Quae non novit virum,
Sed ut pirus pirum,
Gleba fert papyrum,

Florens lilium.
Ecce, quod natura
Mutat sua iura!
Virgo parit pura

Dei filium.

2. Mundum Deus flebilem
Cernens in ruina,
Rosam delectabilem
Produxit de spina,
Natum de regina,
Qui est medicina,

Salus gentium.
Ecce, quod natura
Mutat sua iura!
Virgo parit pura

Dei filium.

3. Nequivit divinitas
Plus humiliari,
Nec nostra carnalitas
Magis exaltari,
Deo coaequari,
Caelo collocari

Per coniugium.
Ecce, quod natura
Mutat sua iura!
Virgo parit pura

Dei filium.