174. De sancta Dorothea.

1. Ave, sancta Dorothea,
Consolatrix et spes mea,
Peccatorum de morphea
Sana me et justum crea,

2. Ave, virgo mitis tota,
Da, ut caritas sit nota
Mihi, per quem fracta vota
Scelerata forent lota.

3. Ave, sceptum Christi gratum
Liliumque delicatum,
Miseriae meae statum
Mihi verte in beatum.

4. Ave, vultu nimis clara,
Me pollutum mundum para,
Ut gens saeva et avara
Me non trahat ad amara,

5. Ave, coeli cornu digna,
Mater cunctorum benigna,
Christo, quaeso, me consigna,
Ne me tangat vis maligna.

6. Ave, gemma virtuosa,
Dorothea, vernans rosa,
Esto mihi gratiosa
In hac valle lacrimosa.

7. Ave, flos virginitatis,
Patens glosa sanctitatis,
Statum meae paupertatis
Vide vultu pietatis.

8. Ave, speculum pudoris,
Dorothea, vas honoris,
Me emunda intus, foris
De humore coeli roris.

9. Ave, rivus fluens melle,
Mea mala procul pelle
Et cor meum purga felle,
Ut sim gratus maris stellae.

10. Ave, pietate plena,
Coeli tu dulcoris vena,
Paradisi ad amoena
Me de faece duc terrena.

11. Ave, martyr eximia,
Dorothea, virgo pia,
Cordi meo allevia,
Quae hactenus sunt gravia.

12. Ave, nutrix orphanorum
Consolatrixque moestorum
Et adjutrix afflictorum,
Me consortem fac lectorum.

13. Ave, mea spes sublimis,
Te deposco moestus nimis
Ut cum vitae erit finis,
Me ad Christum fer ab imis

14. Ave, virtus virginalis,
Tuis pasce me sub alis,
Ne in finem jungar malis,
Sed sim justis coaequalis.

15. Ave, balsamus odoris,
Amygdalum clari floris,
Me sanctorum junge choris,
Ut te laudem cunctis horis.

1G. Ave, lumen lucis merae,
Dorothea, miserere
Mei morbisque medere
Et sinistra cuncta tere.

17. Ave, laetitia vera,

Tu moestorum spes sincera,
Cordis mei tu sis sera,
Ne hoc intret vorax fera.

18. Ave, Christi disciplina,
Mitem mihi te inclina
Corque serves a ruina,
Hostis fiam ne rapina.

19. Ave, rutilans aurora,
Virgo fulgens et decora,
Jesum flecte et exora,
Ut sim felix mortis hora.

20. Ave, consors angelorum,
Choris infer me sanctorum.
Deum laudem ut deorum
Cunctis horis saeculorum.

21. Ave, clemens et intacta,
Dorothea virgo sancta
Per te in me sint confracta
Scelerata quaevis acta.

22. Ave, quae es cordis rei
Ancora et forma spei,
Interventrix esto mei
In conspectu summi Dei.

23. Ave, sidus tu praeclarum,
Causas aufer ruinarum
Atque Christo fac me caram,
Qui est salus animarum.

24. Ave, mea advocata,
Dorothea sis rogata,
Ut defectus et peccata
Per te a me sint ablata.

25. Ave, domus pietatis,
Flos totius honestatis,
Dies praesta sanitatis
Meque serva a peccatis.

26. Ave, virgo dulcis famae,
Vitiosa aufer a me,
Ut culparum mihi squamae
Non sint cruciatus flammae.

27. Ave tu, quae scribam rosis
Paradisi speciosis
Seducis a falsis glosis
Salvans dictis gloriosis.

28. Ave, virgo Christi bona,
Te exoro voce prona,
Ut haec laudis meae dona
Tua perstent in corona.

29. Ave, palmes verae vitis,
Dorothea sponsa mitis,
Cum operibus contritis
Aufer cordis flammas litis.

30. Ave, cellula virtutum,
In extremis fac me tutum,
Tuum praebens mihi scutum,
Ne formidem tunc versutum.

31. Ave, agonista fortis,

Praesens sis in hora mortis,
Ne inferni jungar portis,
Sed in coeli laeter hortis.

32. Ave, victrix tormentorum,
Te exoro, ut meorum
Memor exstes amicorum,
Vivorum et mortuorum.