174. De sancto Augustino.

1 a. Tuba clangat nostri ducis,
Induamus arma lucis
Et stemus in proelio.

1 b. Nos ad pugnam coartemur,
Dum potenter cingis femur
Spiritali gladio,

2 a. Pie ductor, Augustine,
Exemplorum ac doctrinae
Nos praecedis clipeo,

2 b. Contra turmas vitiorum
Dam catervas clericorum
Ordinas in cuneo.

3 a. Arca tenax tu sophiae,
Cuius velut Isaiae
Purgat Seraph labium,

3 b. Argumenta dum Platonis
Linquens cordi fidem ponis,
Consulens Ambrosium.

4a. A quo missus Isaiam

Legis, unde carpens viam
Pauli dicta perficis,

4 b. Praesul factus monens clerum
Contemptorem esse rerum,
Nec habentes abicis.

5 a. Hinc utrosque rege, pater,
Ne concludat locus ater
Nos in fine saeculi;

5 b. Vincla cadant, ruant muri,
Hostes cedant, stent securi
Tuae sortis famuli.