175. De sancto Augustino.

1. Melodiae canticis
Iungentes angelicis
Nostra quoque gaudia

2 a. Laudemus in tympanis,
In chordis et organis
Ipsum, cuius gratia

2 b. Augustinum hodie
Corona iustitiae
Ditavit et gloria.

3 a. Dulce melos dulciter
Personemus pariter
Ad eius sollemnia;

3 b. Voci vita consonet,
Dulce melos personet
Ambarum concordia.

4 a. Hic, gentilis dum fuit,
Manichaeis paruit,
Sed precum instantia
Mater illum, propria

4 b. Quem carne pepererat
Mundo, Christo generat,
Et tumens scientia
Humilis fit gratia.

5 a. Differebat primum quidem
Baptizari sperans fidem
Humana scientia

5 b. Posse capi, sed secutus

Paulum Christum est indutus
Ipsum, cuius gratia

6 a. In medio ecclesiae
Spiritu sapientiae,
Intellectus copia,

6 b. Os repletum aperuit ;

Doctrina sana claruit

Praesulis facundia.

7 a. Libros ille
Scripsit mille;
Vivis dixit,
Nobis scripsit,
Haereticorum varia
Quo vitatur perfidia.

7 b. Scripsit vero
Suo clero

Vitae normam,
Sed dans formam,

Ut castis sind communia
Oboedienter omnia.

8 a. Augustine,
Flos divine,
Palmes mitis
Verae vitis,
Uva vinum
Dans divinum,

Mellis, lactis copia,

8b. Tuam gentem
Insistentem
Tuae laudi
Clemens audi,
Pia prece
Purga faece

Christoque concilia,

9. Ut cum sanctis in gloria
Decantemus Alleluia,