177. De sancto Moriano.

1. In hoc festo martyris,

Fratres jucundemur,
Ne fermenti veteris

Faece praegravemur,
Sinceres in azymis

Simul epulemur
Et praeclari palmitis

Palmam veneremur.

2. Iste sicut lilium

Palmes germinavit
Et in aquis Siloe

Vestes candidavit,
Ut vernans in Jericho

Rosa rutilavit,
Nam in agni sanguine

Stolam suam lavit.

3. Tractus ante judicem

Litera contestatur,
Se trinum Deum colere

Non infitiatur
Et mortis sententiam

Pati gloriatur,
Ut perenni gaudio

Libere fruatur.
4. Ex Aegypti tenebris

Postquam est translatus,
Mox accinctus renibus,

Pedes calciatus,

Spiritali baculo
Fortiter armatus,

Phase verum peragens
Transit immolatus.

5. Exiens de Jericho

Hierusalem tendit,
Unde quondam saucius

Hic homo descendit
Et palmae dulcissimos

Fructus apprehendit,
Cautus et ad lapidem

Pedem non offendit.

6. Jam victor stelliferam

Colit regionem
Et compensat praemio

Duram passionem,
Nam de mensa percipit

Benedictionem,
Christum sibi computans

Summam petitionem.
7. Nostram non ambigimus

Catervam decere,
Ut hoc festum studeat

Colere sincere,
Sed hoc non sufficimus

Decenter implere,
Tu autem, o Domine,

Nostri miserere.