178. De s. Augustino Zagrabiensi.

1 a. Eia, plaude,

Laudes pange,
Corde gaude,
Voce clange
Magno tuo praesuli;

1b. Tuo duci

Nunc ad aras,
Tuae luci
Redde claras

Grates, urbs Zagrabia.

2 a. Nam millenis
Te coronat
Et amoenis
Adhuc ornat

Infulas splendoribus.

2 b. Illas praesul
Olim rexit,
Istinc exsul
Non neglexit

Translatus Luceriam.

3 a. Augustine,

Clarum lumen,
Quem divine
Magnum numen
Ornat, sol iustitiae,

3 b. Ad amictum

Tuum stamus,
Cor invictum,
Te rogamus,

Da tuis clientibus.

4 a. Fide una,

Dei cultu,
Velut luna
Plena vultu

Regnum nostrum fulgeat.

4 b. Dei cultor,

Vires reddis,
Stygis ultor,
Mira edis

In cunctis prodigia.

5 a. Cum vis dira

Papae manum
Vexat, mira

Res, mox sanum
Facis tuo basio.

5 b. Hic perdices

Ponit suaves,
Tu in pisces
Mutas aves

Praesul tunc Zagrabiae.

6 a. Hic aquarum

Adhuc fontes,
Tiliarum

Illic frondes,
Tuae rarum
Colunt gentes

Tropaeum potentiae.

6 b. Caeli flamma,
Augustine,
Pelle damna,

Cessent minae,
Nos inflamma
Seraphinae

Caritatis ignibus.

7 a. Tua virtus,

Fac, nos sanet,
Deum orbis

Totus amet,
Echo cordis
Mille clamet

Laudes summo numini.

7 b. Almo patri,

Qui creavit,
Nato, nos qui
Reparavit,
Spiritui,

Qui sacravit,

Laus, honor in saecula.