168. De Nativitate Domini.

1. De radice processerat
Iesse virga mirifica,
Quae mirum florem gesserat,
Fecunda vi deifica.

2. Huius virgae mysterium
Si sane vis percipere,
Virginis puerperium
Tu debes intellegere.

3. Flos Christus est in saeculo
Dans odorem veraciter
Et in caeli rosario
Coruscans aeternaliter.

4. In fructum flos convertitur
Gustando salutiferum,
Hoc est corpus, dum loquitur
Natus ante luciferum.

5. Granum, de cuius fructibus
Egens turba reficitur,
Christus pro nobis omnibus
Cadens in terra moritur.