186. Cursus de Angelis.
Feria secunda.

Ad Matutinum.

1. Quem veneratur civium
Caelestium exercitus,
Regem adorant omnium
Angelicique spiritus,

2. Per hos rogamus intime,
Nostra sume precamina,
Custodi nos tutissime
Cuncta pellens discrimina.

3. Laus tibi, Deus, penitus,
Quem laudum voce sedula
Collaudat omnis spiritus
In saecularum saecula.

Ad Laudes.

1. Aeterne rerum conditor,
Qui mare, solum, aethera
Gubernas, iustus redditor
Cuiusque iuxta opera,

2. Superbum nempe spiritum
Cunctosque suos complices
Damnando in interitum
Veros firmasti supplices.

3. Qui laudum tibi carmina
Nunc concinunt alacriter,
Per quos nostra peccamina
Relaxa placabiliter.

4. Nos consoleris iugiter
Ser spiritus angelicos,
Cum his ut hymnos pariter
Tibi pangamus melicos.

5. Laus tibi, Deus, penitus.
Ad Primam.

1. Deus, qui ad imaginem
Tuam creando hominem
Hunc paulo minus minuis
Ab angelis innocuis,

2. Te ergo cum hymnidicis
Choris laudamus caelicis,
Qui nos in locum suscipis
Deiecti mundi principis.

3. Sit angelorum Domino
Laus, honor sine termino.
Qui suis in caelestibns
Nos societ spiritibus.

Ad Tertiam.

1. O principes angelici,
Creati regis caelici
Ad contemplandam speciem
Eiusque puram faciem

2. Portas vestras attollite,
Pie nobis occurrite,
In montem ferte Domini
Eius psallentes nomini.

3. Sit angelorum Domino.
Ad Sextam.

1. O Deus exercituum
Caelestium spirituum,
In thronis caeli residens
Cunctisque mire praesidens,

2. Nos, quaesumus, custodiat
Ac incessanter muniat
Virtus tibi astantium
A telis malignantium.

3. Sit angelorum Domino.
Ad Nonam.

1. Caelestis regis principes,
Cuius ut nos participes
Simus cum caeli civibus,
Vestris iuvate precibus,

2. Tersoque mentis nubilo
Vobiscum dulcis iubilo
Nos Deo exercituum
Psallamus in perpetuum.

3. Sit angelorum Domino.
Ad Vesperas.

1. Summae Deus potentiae,
Qui ordines ieracbicos
Virtute sapientiae
Mire distinguis caelicos,

2. Precamur te suppliciter,
Hos defensores dirige,
Nobis per quos fertiliter
Salutis dona porrige.

3. Nos consolando visitent,
Purgent, inflamment, doceant,
Ad bona semper incitent,
Vim daemonum coerceant

4. Devotisque congaudeant
Ac roborent virtutibus,
Ut hi ipsorum compleant
Cohortes in caelestibus.

5. Laus tibi, Deus, penitus.
Ad Completorium.

1. [O] angelorum gloria,
Fac horum nos custodia
Semper peccata fugere
Hostemque saevum vincere.

2. Nunc munda cordis aciem,
Ut facie ad faciem
Te contemplemur dulciter
Cum angelis perenniter.

3. Sit angelorum Domino.