182. De sancto Barnaba.

la. Iure Dominum de caelis
Laudat contio fidelis
Speciali cantico ;

1b. Barnabas namque beatus
Hodie est aggregatus
Agmini angelico.

2 a. In apostolum electus
Pauli comes est effectus
Atque consors praemii;

2 b. Saepe cordis ex affectu
Caesus flagris a conspectu
Rediit concilii.

3 a. Fervens sator verbi Dei
Evangelium Matthaei
Sumpsit sibi socium,

3 b. Huius tactu restituti
Multi pristinae saluti
Leguntur languentium.

4 a. Tandem vago tostus igne
Meruit coniungi digne
Beatorum coetui,

4 b. Christo sede consessurus
Ac iudicium daturus
Duodenae tribui.

5 a. Igne divini amoris
Ab intus ure et foris
Renes et praecordia,

5 b. Ne nos tenebris externis
Aut flammis tradat aeternis
Finalis sententia.