184. De sancto Hieronymo.

1. Dispensator scripturarum
Jeronyme tu sacrarum,

Doctorque eximie,
Protege me supplicantem.
Serva tibi famulantem,

Excelse Christicole.

2. Funde preces, flecte Deum,
Ut illustret pectus meum,

Ad te mentem erigo,
Ut sim salvus tuo dono,
Totam in te spem repono
Te patronum eligo.

3. Ecclesiac tuae electus
Doctor factus et perfectus

Et flos pudicitiae,
Vagos stringe cogitatus,
Per te salvus in me status

Degat innocentiae.
4. Sensus frena fluctuantes.
Hostes fuga conturbantes,

Reprime daemonia,
Doma mentem, iram frena,
Confer pacem, cor serena,

Aufer adversantia.
5. Doctor clare, tu dignare
Delictorum impetrare

Mihi Christi veniam,
Ut sic possim respirare
Excessusque emendare

Consecutus gratiam.

6. Confer vitae sanitatem,
Dona morum honestatem

Et quieta tempora,
Auge veram caritatem
Pectorisque puritatem,
Me languentem robora.

7. O lucerna, flos virtutum,
Doctor tenens iter tutum,

Stella lucens sedulo,
Jubar tuae pietatis
Me defendat a peccatis

Tollens ab ergastulo.
8. Vitae meae rege cursum,
Post hanc vitam tolle sursum

Animam ad gaudia,
Ubi Deum contemplari
Justisque consociari

Merear in gloria.