QUAESTIO UNICA. Utrumpeccatum A dae fuit gravissimum 1

Alens. 2. p. q. 120. m. 4. D. Bonav. hic a. 3. q. 3. D. Thom. 2.2. q. 163. art. I Richard. a. 3. q. 2. Durand. q . 3. Gabr. q. I. Scot. dist . 21. quaest. 2. et I.

Circa distinctionem vigesimam secundam quaeritur primo : Utrum peccatum Adae fuisset gravissimum peccatum ? Quod sic, quia secundum Augustinum in Enchirid. In ratione est peccatum, quia adimit bonum ; sed hoc peccatum adimit maximum bonum, quia a tota posteritate ; igitur gravissimum fuit.

Item, secundum justitiam paena condigna debetur delicto, quia Apocal. 18. dicitur : Quantum glorificavit se, et in deliciis fuit, tantum date ei tormentum et luctum, etc. Sed isti culpae debetur maxima paena, ut patet, sibi et toti posteritati ; igitur haec culpa fuit maxima.

Item, super illud Psalm. 68. Quae non rapui, tunc exolvebam, dicit Augustinus quod Adam voluit rapere aequalitatem Dei ; hoc autem est maximum peccatum, quia hoc fuit peccatum Angelorum.

Oppositum habet Augustinus 12. super Gen. dicens peccasse ex carnali quadam benevolentia erga uxorem ; et ita communiter fit, ut offendatur Deus, ne offendatur amicus, et ita peccavit Adam, ne contristaret uxorem. Sed illud peccatum non fuit gravissimum, quia diligere mulierem suam non fuit malum ex genere ; igitur nimis diligere non potuit fuisse peccatum gravissimum.