184. De sancto Bartholoniaeo.

1 a. Glorietur totus mundus,
Chorus canat laetabundus,
Inter haec sollemnia;

1 b. Honor tanto sit diei,
Quo sancti Bartholomaei
Dat odorem gloria.

2 a. Hic superna sanctione
Indos petit unctione
Doctus sancti spiritus.

2 b. Gens in terra paganismi
Sancti eget catechismi;
Hinc Astaroth territus

3 a. Non est ausus immutire,
Causam innotescit irae
Per vicinum idolum;

3 b. Berith pandit de socio,
Cur tenetur silentio,
Nam timet apostolum.

4 a. Addit signa notitiae,
Qualis cultu vel facie,
Quod in prece sedulus.

4 b. Non per signa increduli,
Sed per signa miraculi
Hunc agnoscit populus.

5 a. Daemon saucto imperante
Aegrum, quem possedit ante,
Liquit dicto citius.

5 b. Credo victus declaratur,
Regis nata emundatur,
Triumphat Polymius.

6 a. Praebet aurum mundatori,
Sed plus illi est ardori
Regem lucrifacere ;

6 b. Hunc seductus fallaciae
Princeps mandat in facie,
Ut cessent se colere.

7 a. Nec virtutem iusti ferens
Templi fines liquit maerens
Tunc Christi discipulus ;

7 b. Verbis pluit, signis tonat,
Sospitati aegros donat,
Credit rex et populus.

8 a. In his deos pessum agi
Ut allegant Astryagi
Templorum pontifices,

8 b. Pellis tunica nudari

Sicque sanctum decollari
Mandat per carnifices.

9 a. De cruore laureatum
Ad Indorum patronatum
Quem evexit passio,

9 b. Votis fave, summe Deus,
Quo nobis Bartholomaeus
Non desit suffragio.