191.

1. Dies nobis hodie

Celebris illuxit,
Quo coelestis gratiae

Mundo fons influxit,
David ex progenie

Virgulam produxit,
Cujus flos, rex gloriae,

Zabulum destruxit.

2. Profert campus lilium,

De quo prodit rosa,
Ut coronet filium

Mater generosa,
Regis fit hospitium

Virgo speciosa,
Cujus vitae pretium

Mors est pretiosa.
3. Stella maris oritur

Solem paritura,
Generandae gignitur

Proli genitura,
Byssus regi texitur

Illum vestitura,
Qui nullius capitur

Gigantis mensura.

4. Haec est arca foederis,

Rubus visionis,
Rore madens aetheris

Vellus Gedeonis,
Legis summa veteris,

Templum Salomonis
Et thronus prae ceteris

Sublimatus thronis.
5. Haec est illa scirpea

Moysi fiscella,
Deum carnis trabea

Vestiens puella,
Rore madens area,

Sacra thuris cella.
Sole lucens vitrea,

Fundens apis mella.
6. His a clero laudibus

Virgo salutata,
Diem venerantibus,

Quo nobis es nata,
Tua confer omnibus

Prece Deo grata
In regnis coelestibus

Gaudia beata.